活在廿一世紀，忙碌不堪嘅年輕人，理應享受住充滿櫻花氣息嘅校園生活，或者喺閒暇時光，同可愛嘅情人一齊出遊。聽講就快大學畢業嗰陣，個個都忙住衝入求職嘅窄門。係呀，聽講係咁。 你唔知。你冇可能知。你根本冇機會知。中學輟學，代替自殺嘅爸爸一力承擔家計嘅你，根本無從得知。你冇辦法成為手拎住父母畀嘅暖包、走入考場嘅中六學生，亦都冇辦法體會考上大學嘅喜悅或者落榜嘅絕望。你膊頭上嗰個叫「人生」嘅重擔太過沉重，沉重到連嗰啲微不足道嘅瑣碎事，都冇力掌握。 你用力咁擦完又擦。擦到浸喺水度而浮腫嘅雙手再都擠唔出一絲力氣，手指不停咁顫抖。小學六年級，喺嗰個濕度高到令人窒息嘅盛夏，你擦走咗離你而去嘅爸爸留低嘅痕跡。爸爸黏膩咁沾染喺黃色油布上嘅最後選擇，你冇辦法理解。無論用盡幾多力氣去擦，都擦唔甩嗰塊油布上，喺你淚珠底下嗰個貧窮嘅印記。爸爸喺空中搖晃嘅雙腿，亦都喺你腦海中揮之不去。飲咗一半嘅高粱酒樽、用黃色橡筋紮住嘅一大疊藥包，仲有唔知係咪想寫成遺書，留畀你嘅最後嗰張五百蚊紙上，龍飛鳳舞嘅字跡。 順住蜿蜒交錯嘅斜路，沿住老舊住宅嘅牆壁行，會見到一扇吱吱作響嘅鐵閘。嗰度係你嘅安身之處，係爸爸留低最後身影嘅地方，亦都係一個欠咗六個月租金嘅屋企。落雨就發霉，晚晚都聽到酒鬼們喧鬧嘅半地下室，就係你打咗成日工之後，返嚟唯一可以瞓嘅地方。 即使係咁，你都係硬吞冷飯，好似發咗癲咁搏命打工，盛夏連把風扇都唔捨得開，嚴冬就算凍到牙關打震都只係沖凍水涼，呢一切或者都係出於嗰種該死嘅、頑強嘅求生本能啦。喺呢塊赤腳踩上去就黏𥹉𥹉嘅、悲哀嘅黃色油布上。